ಕೂಲಿ ಮಾಡಿ ಕಟ್ಟಿದ ಮನೆಗೂ ನೆಮ್ಮದಿಯಿಲ್ಲವೇ? ನನ್ನ ಮನೆಯನ್ನು ಉಳಿಸಿಕೊಡಿ ಎಂದು ಕಣ್ಣೀರಿಡುತ್ತಿರುವ ಹೇಮಾವತಿ!

Share to all

ಕೂಲಿ ಮಾಡಿ ಕಟ್ಟಿದ ಮನೆಗೂ ನೆಮ್ಮದಿಯಿಲ್ಲವೇ? ನನ್ನ ಮನೆಯನ್ನು ಉಳಿಸಿಕೊಡಿ ಎಂದು ಕಣ್ಣೀರಿಡುತ್ತಿರುವ ಹೇಮಾವತಿ!

ಹುಬ್ಬಳ್ಳಿ:-ಜೀವನಪೂರ್ತಿ ಕೂಲಿ ನಾಲಿ ಮಾಡಿ, ಬೆವರು ಸುರಿಸಿ, ಕಷ್ಟಪಟ್ಟು ಕಟ್ಟಿಕೊಂಡ ಪುಟ್ಟ ಮನೆಯೇ ಒಬ್ಬ ಮಹಿಳೆಯ ಪಾಲಿಗೆ ಬದುಕಿನ ಆಸರೆಯಾಗಿರುತ್ತದೆ. ಆದರೆ ಅದೇ ಮನೆ ಕೈತಪ್ಪುವ ಭೀತಿ ಎದುರಾದರೆ ಆಕೆಯ ಬದುಕು ಹೇಗಾಗಬಹುದು?.

ಇಂತಹದ್ದೇ ಒಂದು ಮನಕಲಕುವ ಘಟನೆ ಹುಬ್ಬಳ್ಳಿಯಲ್ಲಿ ಬೆಳಕಿಗೆ ಬಂದಿದೆ.
ಹೇಮಾವತಿ ಎಂಬ ಮಹಿಳೆ 2001ರಲ್ಲೇ ಮನೆ ಖರೀದಿಸಿದ್ದು, ಅಂದಿನಿಂದ ಆ ಮನೆಯನ್ನು ತನ್ನ ಬದುಕಿನ ಆಧಾರವನ್ನಾಗಿ ಮಾಡಿಕೊಂಡಿದ್ದಾರೆ. ಆದರೆ ಇದೀಗ ವಿನಾಯಕ ಎಂಬ ವ್ಯಕ್ತಿ ತನ್ನ ಮನೆಯನ್ನು ಅಕ್ರಮವಾಗಿ ಕಬಳಿಸಿದ್ದಾರೆ ಎಂಬ ಗಂಭೀರ ಆರೋಪವನ್ನು ಹೇಮಾವತಿ ಮಾಡಿದ್ದಾರೆ.

 

“ನನ್ನ ಮನೆ ನನಗೆ ಉಳಿಸಿಕೊಡಿ ಪ್ಲೀಜ್… ನಾನು ಎಲ್ಲಿಗೆ ಹೋಗಲಿ?”
ಎಂದು ಕಣ್ಣೀರಿಡುತ್ತಿರುವ ಹೇಮಾವತಿಯ ನೋವು ಎಂಥವರ ಮನವನ್ನೂ ಕಲಕುವಂತಿದೆ.
ಹೇಮಾವತಿ ಅವರ ಆರೋಪದ ಪ್ರಕಾರ, ವಿನಾಯಕ ಹಾಗೂ ಇತರ ಹತ್ತು ಮಂದಿ ಸೇರಿಕೊಂಡು ತಮ್ಮ ಜಡೆ ಹಿಡಿದು ಹಲ್ಲೆ ನಡೆಸಿದ್ದಾರೆ. ಕೊಲೆ ಮಾಡುವುದಾಗಿ ಬೆದರಿಕೆ ಹಾಕಿ, ಮನೆಯೊಳಗೆ ಕುಳಿತುಕೊಂಡಿದ್ದಾರೆ ಎಂದು ಆರೋಪಿಸಿದ್ದಾರೆ.

ಇನ್ನೊಂದೆಡೆ, ಪತಿ ಅನಾರೋಗ್ಯದಿಂದ ಬಳಲುತ್ತಿದ್ದು, ಕುಟುಂಬದ ಜವಾಬ್ದಾರಿಯನ್ನೂ ನಿಭಾಯಿಸಬೇಕಾದ ಅನಿವಾರ್ಯತೆ ಹೇಮಾವತಿ ಅವರ ಮೇಲಿದೆ. “ನಾನು ಕೂಲಿ ಕೆಲಸ ಮಾಡಬೇಕು, ದುಡಿದು ಬದುಕಬೇಕು. ದಯವಿಟ್ಟು ನನ್ನ ಮನೆಯನ್ನು ನನಗೆ ಉಳಿಸಿಕೊಡಿ” ಎಂದು ಕೈಮುಗಿದು ಮನವಿ ಮಾಡುತ್ತಿದ್ದಾರೆ.

*ಪೊಲೀಸ್ ಠಾಣೆ ಮೆಟ್ಟಿಲೇರಿದರೂ ನ್ಯಾಯ ಸಿಗುತ್ತಿಲ್ಲವೇ?*

ತಮ್ಮ ಮೇಲಿನ ಹಲ್ಲೆ ಹಾಗೂ ಮನೆ ಕಬಳಿಕೆ ಆರೋಪದ ಕುರಿತು ಹಳೇಹುಬ್ಬಳ್ಳಿ ಪೊಲೀಸ್ ಠಾಣೆಗೆ ಹಲವು ಬಾರಿ ತೆರಳಿದ್ದರೂ ದೂರು ಸ್ವೀಕರಿಸುತ್ತಿಲ್ಲ ಎಂಬುದು ಹೇಮಾವತಿ ಅವರ ಮತ್ತೊಂದು ಗಂಭೀರ ಆರೋಪ.
ನಾಲ್ಕೈದು ಬಾರಿ ಠಾಣೆಗೆ ಅಲೆದಾಡಿದರೂ, ‘ಕೋರ್ಟ್‌ಗೆ ಹೋಗಿ’ ಎಂದು ಹೇಳುತ್ತಿದ್ದಾರೆ. ನನ್ನ ಅಳಲನ್ನು ಕೇಳುವವರೇ ಇಲ್ಲ ಎಂದು ಮಹಿಳೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಒಂದು ಕಡೆ ಮನೆ ಕಳೆದುಕೊಳ್ಳುವ ಆತಂಕ, ಮತ್ತೊಂದು ಕಡೆ ಪತಿಯ ಅನಾರೋಗ್ಯ, ಜೀವನ ಸಾಗಿಸಲು ಕೂಲಿ ಕೆಲಸವನ್ನೇ ನಂಬಿಕೊಂಡಿರುವ ಪರಿಸ್ಥಿತಿ… ಇವೆಲ್ಲದರ ನಡುವೆ ನ್ಯಾಯಕ್ಕಾಗಿ ಒಬ್ಬಂಟಿಯಾಗಿ ಹೋರಾಡುತ್ತಿರುವ ಹೇಮಾವತಿ ಅವರ ಕಣ್ಣೀರಿಗೆ ಕೊನೆಯೇ ಇಲ್ಲದಂತಾಗಿದೆ.
ಇದು ಕೇವಲ ಮನೆ ವಿವಾದವಲ್ಲ… ಒಬ್ಬ ಮಹಿಳೆಯ ಬದುಕಿನ ಪ್ರಶ್ನೆ!

ಬಡವರು ಬೆವರು ಸುರಿಸಿ ಕಟ್ಟಿಕೊಂಡ ಮನೆಯನ್ನು ಉಳಿಸಿಕೊಳ್ಳಲು ಸಾಧ್ಯವಾಗದಿದ್ದರೆ, ಸಾಮಾನ್ಯ ಜನರಿಗೆ ರಕ್ಷಣೆ ನೀಡುವವರು ಯಾರು?
ಹೇಮಾವತಿ ಮಾಡಿರುವ ಆರೋಪಗಳ ಬಗ್ಗೆ ಪೊಲೀಸ್ ಇಲಾಖೆ ಸಮಗ್ರ ತನಿಖೆ ನಡೆಸುತ್ತದೆಯೇ? ಮಹಿಳೆಯ ದೂರನ್ನು ಕಾನೂನು ಪ್ರಕಾರ ಪರಿಶೀಲಿಸಿ ಸೂಕ್ತ ರಕ್ಷಣೆ ನೀಡುತ್ತದೆಯೇ? ಆಕೆಯ ಮನೆಯ ವಿವಾದಕ್ಕೆ ನ್ಯಾಯಯುತ ಪರಿಹಾರ ಸಿಗುತ್ತದೆಯೇ?
ಹುಬ್ಬಳ್ಳಿಯಲ್ಲಿ ಕಾನೂನಿಗಿಂತ ಬಲಪ್ರಯೋಗವೇ ಮೇಲುಗೈ ಸಾಧಿಸುತ್ತಿದೆಯೇ?
ಮನೆ ಕಳೆದುಕೊಳ್ಳುವ ಆತಂಕದಲ್ಲಿ ಕಣ್ಣೀರಿಡುತ್ತಿರುವ ಈ ಮಹಿಳೆಗೆ ನ್ಯಾಯ ಕೊಡಿಸುವವರು ಯಾರು?

ಹೇಮಾವತಿ ಅವರಿಗೆ ನ್ಯಾಯ ಸಿಗಲಿ… ಅವರ ಬದುಕಿನ ಆಸರೆಯಾಗಿರುವ ಮನೆ ಉಳಿಯಲಿ ಎಂಬುದೇ ಸಾರ್ವಜನಿಕರ ಆಶಯ.

ಮಹಿಳೆ ಆರೋಪ ಆಧರಿಸಿ ಸುದ್ದಿ ಮಾಡಲಾಗಿದೆ..ಆರೋಪಿತರು ತಮ್ಮ ಅನಿಸಿಕೆಯನ್ನು ಹೇಳಬಹುದು..

ಉದಯ ವಾರ್ತೆ
ಹುಬ್ಬಳ್ಳಿ.


Share to all

You May Also Like

More From Author